Zëdhënësi i Aleancës, Kushtrim Xhemaili, ka reaguar pas publikimit të gabuar të stemës dhe hartës së Kosovës në faqen zyrtare të Kuvendit, duke e cilësuar këtë rast si tregues të, siç është shprehur ai, mungesës së përgjegjësisë nga ana e institucioneve.
Xhemaili ka deklaruar se në institucionet e vendit janë persona që, sipas tij, në të kaluarën nuk i kanë pranuar simbolet shtetërore të Kosovës, ndërsa sot përmes pakujdesisë dhe mungesës së profesionalizmit po i dëmtojnë ato.
Ai ka kritikuar zyrtarët institucionalë duke thënë se, sipas tij, ata nuk kanë të njëjtin qëndrim kur bëhet fjalë për përfitimet që vijnë nga funksionet publike.
“Për pagat, privilegjet, veturat dhe përfitimet që ua ofrojnë institucionet e Kosovës, shteti u duket i përshtatshëm”, ka shkruar Xhemaili.
Në fund, zëdhënësi i Aleancës e ka cilësuar këtë situatë si një shembull të hipokrizisë, duke theksuar se simbolet shtetërore duhet të respektohen në çdo rrethanë dhe jo vetëm kur lidhen me privilegjet institucionale.
