Aktorja fituese e çmimit Oscar, Hilary Swank, është në pritje të fëmijës së saj të tretë në moshën 52-vjeçare. Ajo ka treguar për herë të parë barkun e rrumbullakosur, ndërsa ka folur edhe për paragjykimet dhe vështirësitë me të cilat përballen gratë që vendosin të bëhen nëna në një moshë më të madhe.
Të enjten, aktorja u shfaq në Nju Jork, pasi doli nga studiot e emisionit “The Drew Barrymore Show”. E veshur me një bluzë të bardhë, xhaketë shumëngjyrëshe, xhinse dhe çizme, Swank u buzëqeshi fansave dhe i përshëndeti ata.
Kjo ishte paraqitja e saj e parë publike që nga njoftimi për shtatzëninë, të cilin e bëri një ditë më parë.
Swank dhe bashkëshorti i saj, Philip Schneider, 53 vjeç, janë tashmë prindër të binjakëve, vajzës Aya dhe djalit Ohm, të cilët erdhën në jetë në prill të vitit 2023, kur aktorja ishte 48 vjeçe.
Shtatzëninë e bëri publike me një video familjare
Lajmin për pritjen e ëmbël, aktorja e ndau edhe në rrjetet sociale, përmes një videoje plot humor dhe atmosferë familjare.
Në pamjet e publikuara në Instagram, ajo shfaqet duke kërcyer së bashku me familjarët e saj në një ambient të errët, ku vërehen figura të ndriçuara në trupat e tyre.
Përveç lajmit të gëzueshëm, Swank ka ngritur edhe çështjen e paragjykimeve ndaj grave që bëhen nëna në një moshë më të madhe. Ajo ka vënë në dukje se këto gra shpesh përballen me më shumë kundërshtime dhe komente negative lidhur me vendimin e tyre për të pasur fëmijë më vonë në jetë.
Përvoja e aktores ka rikthyer në vëmendje diskutimin mbi amësinë pas të 40-ave dhe mënyrën se si shoqëria i trajton gratë që zgjedhin të krijojnë ose zgjerojnë familjen në një etapë më të vonshme të jetës.
