Instituti i Kosovës për Drejtësi (IKD) ka shprehur shqetësim për ndërprerjen e seancës konstituive të Kuvendit të Kosovës, duke vlerësuar se mungesa e një marrëveshjeje politike nuk mund të përdoret si arsye për bllokimin e procesit të konstituimit të institucioneve.
Sipas IKD-së, seanca konstituive është thirrur në ditën e tridhjetë të afatit kushtetues, duke u lënë subjekteve politike kohë të mjaftueshme për të arritur marrëveshje për formimin e institucioneve të reja.
Instituti thekson se seanca kishte nisur sipas procedurave të përcaktuara, pasi ishte verifikuar kuorumi, deputetët kishin dhënë betimin dhe ishte miratuar raporti i Komisionit të Përkohshëm për Verifikimin e Kuorumit dhe Mandateve.
Megjithatë, sipas IKD-së, në vend që procesi të vazhdonte me zgjedhjen e organeve të Kuvendit, seanca u shndërrua në hapësirë për diskutime politike dhe negociata për çështjen e presidentit.
IKD ka vlerësuar se kërkesa e kryeministrit në detyrë, Albin Kurti, për kohë shtesë për konsultime dhe vendimi i kryesuesit të seancës, Avni Dehari, për ndërprerjen e saj, nuk përputhen me natyrën e seancës konstituive.
Sipas institutit, Rregullorja e Kuvendit përcakton se në këtë fazë nuk zhvillohet debat dhe se konstituimi i Kuvendit nuk mund të kushtëzohet me marrëveshje për çështje të tjera politike.
IKD ka theksuar se zgjedhja e presidentit është një proces i veçantë kushtetues dhe nuk mund të vendoset si parakusht për konstituimin e Kuvendit. Sipas tyre, negociatat politike duhet të zhvillohen jashtë seancës, pa penguar funksionalizimin e institucionit më të lartë përfaqësues.
Instituti ka rikujtuar se Gjykata Kushtetuese ka përcaktuar detyrimin që Kuvendi të konstituohet brenda afatit prej 30 ditësh dhe se ky afat nuk është çështje e vullnetit politik.
Sipas IKD-së, mungesa e një sanksioni të përcaktuar për mosrespektimin e këtij afati nuk nënkupton se shkelja e tij është e lejueshme, pasi Kushtetuta duhet të respektohet si akti më i lartë juridik i vendit.
IKD ka bërë thirrje që seanca të vazhdojë menjëherë dhe që procesi i konstituimit të përfundojë brenda afatit kushtetues, pa kushte politike dhe pa vonesa të tjera.
