Nënkryetari i LDK-së, Lutfi Haziri, ka folur pas dorëzimit të nënshkrimeve për thirrjen e Kuvendit të Jashtëzakonshëm të partisë, ku kërkohet shqyrtimi i pozitës së kryetarit Lumir Abdixhiku.
Haziri ka thënë se kërkesa do të trajtohet përmes procedurave të brendshme dhe në përputhje me Statutin e LDK-së, ndërsa përgjegjësia për procesin i takon sekretariatit të partisë, raporton Demantim News.
“Proceduralisht e trajton sekretariati, sipas normave të brendshme politike. LDK-ja di ta vetëmenaxhojë këtë proces”, ka deklaruar Haziri.
I pyetur për mundësinë e shkarkimit të Abdixhikut, ai e ka cilësuar pyetjen si paragjykuese, duke thënë se vendimet do të merren sipas procedurave.
Haziri ka shtuar se nënshkrimet do të verifikohen nga sekretariati, i cili më pas do t’ia dorëzojë rezultatet kryesisë së partisë.
