Kosova ka shënuar një tjetër sukses të rëndësishëm në arenën ndërkombëtare, duke siguruar pesë medalje në garat e xhudos në Taranto të Italisë.
Në mesin e medalistëve, Laura Fazliu ka arritur rezultatin më të mirë, duke fituar medaljen e argjendtë.
Ndërkaq, Akil Gjakova, Flaka Loxha, Fatjona Kasapi dhe Shpat Zekaj kanë përfunduar paraqitjet e tyre me medalje të bronzta, duke e çuar në pesë numrin e medaljeve të Kosovës.
Për suksesin e xhudistëve ka reaguar edhe kryeministri në detyrë, Albin Kurti, i cili ka uruar sportistët dhe ka vlerësuar punën e gjithë ekipit.
Kurti ka veçuar kontributin e kryemjeshtrit Driton Kuka dhe trajneres Majlinda Kelmendi, duke theksuar vazhdimësinë e rezultateve të xhudos kosovare.
“Xhudoja vazhdon t’i sjellë Kosovës medalje, emocione dhe krenari”, ka shkruar Kurti.
Suksesi në Taranto vazhdon traditën e rezultateve të xhudos kosovare, me sportistët që edhe një herë e kanë ngritur Kosovën në podiumin ndërkombëtar.
/Demantim News/
