Familjarët e Jetlira Foniqit kanë reaguar pas ngjarjes së rëndë në të cilën ajo humbi jetën, duke kërkuar që rasti të trajtohet me seriozitet dhe që të mos publikohen versione të pakonfirmuara për motivin e ngjarjes.
Motra e Jetlirës, përmes një reagimi në rrjete sociale, ka shprehur shqetësimin e familjes për pretendimet që kanë qarkulluar rreth mundësisë që ngjarja të jetë shkaktuar nga xhelozia apo tradhtia.
Ajo ka theksuar se familja po kalon një periudhë jashtëzakonisht të rëndë dhe se e vërteta e plotë për motivin ende duhet të përcaktohet nga hetimet.
Sipas deklaratës së saj, personi i dyshuar kishte jetuar për rreth katër vite në Gjermani dhe muajt e fundit kishte qenë i burgosur atje për tentim vrasjeje. Ajo ka pretenduar gjithashtu se ai kishte qëndruar rreth një muaj në një spital psikiatrik dhe se gjendja e tij mendore ishte vlerësuar si e rënduar.
Familjarja ka treguar se Jetlira, e cila ishte shtatzënë, ishte kujdesur për të dhe e kishte shoqëruar në vizita mjekësore, ndërsa ishte përpjekur ta ndihmonte edhe me terapinë që i ishte përshkruar.
“E në fund, krimineli në fjalë na e mori motrën prej nesh”, thuhet në reagimin e familjes.
Familjarët kanë kërkuar që rasti të zbardhet plotësisht dhe përgjegjësit të përballen me drejtësinë. Njëkohësisht, ata kanë apeluar që të mos krijohen versione për motivin e ngjarjes pa u konfirmuar nga organet kompetente.
Motra e Jetlirës ka theksuar se familja nuk kërkon asgjë tjetër përveç të vërtetës dhe drejtësisë, duke kërkuar respekt për dhimbjen e tyre dhe për kujtimin e saj.
Ajo ka bërë të ditur se familja posedon edhe fakte që, sipas saj, mbështesin deklaratat e bëra në reagim.
