Ylli i filmave aksion dhe artisti legjendar i arteve marciale, Chuck Norris, është shtruar në spital në ishullin Kauaʻi në Hawaii, pas një urgjence mjekësore.
Detajet mbi natyrën e emergjencës nuk janë bërë publike, ndërsa burime pranë tij bëjnë me dije se aktori është në gjendje të mirë shpirtërore.
Vetëm pak ditë më parë, ai festoi ditëlindjen e tij të 86-të, duke publikuar një video në rrjetet sociale ku shfaqej duke bërë stërvitje. “Unë nuk plakem, unë ngre nivelin tim,” u shpreh ai, duke shtuar se ndihej mirënjohës për shëndetin dhe mundësinë për të vazhduar aktivitetin që do.
Chuck Norris pritet të shfaqet si vetvetja në filmin e ardhshëm aksion-komedi “Zombie Plane”, përkrah artistëve të tjerë ndërkombëtarë.
Ai është i njohur për publikun në mbarë botën për rolin në serialin televiziv Walker, Texas Ranger, si dhe për filmat si “The Delta Force”, “Missing in Action” dhe “The Expendables 2”.
Aktori mban rripa të zinj në disa disiplina të arteve marciale, përfshirë karatenë dhe taekwondon, dhe mbetet një nga figurat më ikonike të kinemasë aksion.
