Të paktën tre persona kanë humbur jetën nga sulmet ruse me dronë në Ukrainë, ndërsa rreth 370 mijë banorë në rajonin e Volynit kanë mbetur pa energji elektrike pas goditjeve ndaj infrastrukturës energjetike.
Në qytetin lindor të Kharkivit, dy persona u vranë dhe 12 të tjerë u plagosën nga sulmet në tri zona të qytetit, bëri të ditur guvernatori rajonal, Oleh Syniehubov.
Ndërkohë, në rajonin e Volynit, pranë kufirit me Poloninë, një sulm me dron ndaj një objekti të përpunimit të ushqimit shkaktoi vdekjen e një personi dhe plagosjen e tetë të tjerëve.
Sulmet dëmtuan gjithashtu rrjetin energjetik, duke ndërprerë furnizimin me energji elektrike për qindra mijëra banorë. Ekipet e riparimit arritën të rikthenin furnizimin për rreth 100 mijë persona deri në orët e mëngjesit.
Në Lutsk, kryeqytetin rajonal të Volynit, ndërprerjet e energjisë elektrike mund të zgjasin të paktën 24 orë, paralajmëroi kryetari i komunës, Andriy Razumovskyi.
Përveç infrastrukturës energjetike, sulmet goditën edhe dy qendra tregtare, një në qytetin verior të Sumyt dhe tjetrën në rajonin e Rivnes.
Sipas guvernatorit të Rivnes, Oleksandr Koval, shtatë persona u plagosën nga goditjet ndaj një qendre të madhe tregtare dhe lokacioneve të tjera në rajon.
Autoritetet ukrainase po vazhdojnë vlerësimin e dëmeve dhe punën për rikthimin e furnizimit me energji elektrike në zonat e prekura.
