Kreu i AAK-së, Ramush Haradinaj, në një intervistë në Kanal 10 ka thënë se kryeministri në detyrë i Kosovës, Albin Kurti, po dëshiron të krijojë një krizë në Kosovë vetëm për vota.
Haradinaj e ka quajtur Kurtin si “djali i Putinit” duke thënë se kriza në Kosovë nuk i konvenon askujt tjetër pos Rusisë.
Ish-komandanti i Dukagjinit ka përmendur masat e BE-së dhe ndaljen e Dialogut Strategjik me SHBA-në si dëme që Kurti ia ka bërë Kosovës.
Sa i përket raportit të forcave me Serbinë, Haradinaj ka thënë se Kosova mund të llogarisë vetëm në armatimin e NATO-s në Napoli dhe atë të SHBA-ve, meqë nëse aktivizon ushtrinë e vet, mund ta rrezikojë vetëm stabilitetin e vetë.
“Sikur ne ta kishim ndonjë forcë të madhe ushtarake e ta rrezikojshim Beogradin, nëse aktivizohet ajo forcë e jona, kish mujt me thanë dikush ‘ok’. Na kur aktivizohemi vetëm territorin tonë e rrezikojmë, krijojmë krizë në vendin tonë dhe pastaj ky vend i yni në krizë mund të bëhet objekti i ndarjes. Është e pastër matematika e sigurisë. Serbia ka fluturake me nga ngucë pa ia prish gjumin vetit. Ne duhet me llogaritë në ato të NATO-s që i ka në Napoli se nuk i kanë në Kosovë edhe Amerika, të cilët ky po i irriton në mënyrën e vet”, ka thënë Haradinaj.
Haradinaj ka përmendur edhe thirrjen e SHBA-së që Kosova të mos shndërrohet në një vend krize dhe të qëndrojë anash duke kryer detyrat e saj.
