Prokuroria Themelore në Pejë ka ngritur aktakuzë ndaj dy personave, me inicialet V.H. dhe A.K., nën dyshimin se janë përfshirë në një rast mashtrimi në vlerë prej 134 mijë e 761 eurosh.
Sipas komunikatës së Prokurorisë Themelore në Pejë, i pandehuri V.H. dyshohet se gjatë periudhës 26 maj 2021 – 29 shtator 2023 është paraqitur rrejshëm si mjek në specializim në një spital në Turqi.
Prokuroria pretendon se ai i kishte premtuar të dëmtuarit se do t’ia mundësonte kryerjen e transplantimit të veshkës, duke kërkuar dhe pranuar para kinse për shpenzime spitalore dhe procedurat e transplantimit.
“Sipas aktakuzës, i pandehuri dyshohet se ka përdorur në mënyrë të rreme të dhëna, dokumente dhe emra të mjekëve të një spitali në Turqi”, thuhet në komunikatën e Prokurorisë.
Në këtë mënyrë, sipas aktakuzës, të dëmtuarit dyshohet se i është shkaktuar dëm material në shumën prej 134 mijë e 761 eurosh.
Ndërkaq, A.K. dyshohet se ka ndihmuar në kryerjen e veprës penale, duke e prezantuar V.H. si mjek në Turqi dhe duke krijuar besim te i dëmtuari se ai kishte mundësi të organizonte transplantimin e veshkës.
Prokuroria ka bërë të ditur se procedura ndaj një personi tjetër, i cili dyshohet se ishte paraqitur si dhurues i veshkës, është veçuar.
Prokurori i çështjes i ka propozuar gjykatës që të pandehurit të shpallen fajtorë dhe të dënohen sipas ligjit.
