Dy punonjës të Policisë së Shtetit në Shqipëri janë pezulluar nga detyra pas publikimit në rrjetet sociale të një videoje, ku ata shfaqen duke ushtruar dhunë ndaj një të riu në Tiranë.
Vendimi është marrë nga drejtori i Përgjithshëm i Policisë së Shtetit, Skënder Hita, pas reagimeve të shumta që kanë nxitur pamjet e publikuara.
Sipas njoftimit zyrtar, të pezulluarit janë inspektori E. P., pjesë e Patrullës së Përgjithshme, dhe inspektori T. Ç., i angazhuar në Komisariatin e Policisë Nr. 3 në kryeqytet.
Krahas pezullimit të menjëhershëm, ndaj të dy zyrtarëve policorë është urdhëruar edhe nisja e një hetimi disiplinor, me qëllim shqyrtimin e veprimeve të tyre dhe vlerësimin e respektimit të standardeve profesionale gjatë ushtrimit të detyrës.
Policia e Shtetit ka theksuar se nuk do të tolerojë raste të përdorimit të dhunës apo tejkalimit të kompetencave nga punonjësit e saj.
Në reagimin zyrtar është nënvizuar se përgjegjësia për veprimet e kryera është individuale, ndërsa sjellje të tilla dëmtojnë imazhin e institucionit dhe besimin e qytetarëve te Policia.
Hetimi disiplinor pritet të sqarojë rrethanat e ngjarjes dhe përgjegjësinë e dy punonjësve të përfshirë.
