Qytetarët e Kosovës do të kenë mundësi të aplikojnë për vizë elektronike ose të pajisen me vizë në mbërritje për udhëtime turistike në Arabinë Saudite, pas vendimit të autoriteteve saudite për lehtësimin e procedurave të hyrjes në vend.
Lajmi është bërë i ditur nga Ministria e Punëve të Jashtme dhe Diasporës, e cila ka njoftuar se Kosova është transferuar nga Grupi B në Grupin A të shteteve që përfitojnë nga këto lehtësime.
Procedura më të lehta për udhëtime turistike
Me këtë ndryshim, shtetasve të Kosovës u mundësohet qasje në procedura më të lehtësuara për pajisjen me vizë turistike, përmes aplikimit elektronik ose marrjes së vizës pas mbërritjes në Arabinë Saudite.
Ky zhvillim pritet t’ua lehtësojë qytetarëve planifikimin e udhëtimeve turistike drejt këtij shteti, duke reduktuar pengesat administrative që lidhen me procedurat e vizave.
MPJD: Hap pozitiv për marrëdhëniet mes dy vendeve
Ministria e Punëve të Jashtme dhe Diasporës e ka vlerësuar vendimin e autoriteteve saudite si një zhvillim pozitiv për qytetarët e Kosovës.
Sipas ministrisë, lehtësimi i procedurave të vizave kontribuon në nxitjen e lëvizjes së qytetarëve dhe forcimin e bashkëpunimit e të marrëdhënieve ndërmjet Kosovës dhe Arabisë Saudite.
