Një person është arrestuar në Prishtinë nën dyshimin se është prezantuar rrejshëm si punonjës i Agjencisë së Kosovës për Inteligjencë (AKI), duke u kërkuar qytetarëve para në këmbim të premtimit për punësim në këtë institucion.
Sipas Policisë së Kosovës, i dyshuari me inicialet D.N. dyshohet se e ka kryer këtë veprim nga fillimi i vitit 2025 deri në momentin kur rasti është raportuar në tetor të këtij viti.
Arrestimi është realizuar sot nga hetuesit e Njësisë së Hetimeve të Përgjithshme në Prishtinë, në bashkëpunim me AKI-në dhe Prokurorinë Themelore në Prishtinë, pas veprimeve hetimore dhe sigurimit të provave e dëshmive.
I dyshuari ndalohet për 48 orë
Me vendim të prokurorit të shtetit, ndaj të dyshuarit është caktuar masa e ndalimit për 48 orë, ndërsa procedurat ligjore do të vazhdojnë më tej.
Policia ka bërë të ditur se do të vazhdojë bashkëpunimin me institucionet përkatëse për parandalimin dhe hetimin e veprave penale, si dhe për mbrojtjen e qytetarëve nga mashtrimet dhe keqpërdorimi i besimit.
Policia apel qytetarëve: Mos paguani për premtime punësimi
Policia e Kosovës u ka bërë thirrje qytetarëve të tregojnë kujdes ndaj personave që pretendojnë se mundësojnë punësim në institucione publike në këmbim të parave.
Qytetarët janë ftuar që rastet e tilla t’i raportojnë në polici, në mënyrë që të ndërmerren veprimet e nevojshme ligjore.
Hetimet për rastin po vazhdojnë, ndërsa ndaj personit të arrestuar vlejnë procedurat dhe garancitë ligjore përkatëse.
